ప్రతి ఒక్కరికి కారు అంటే ఇష్టం. కానీ బడ్జెట్ పరంగా మధ్యతరగతి ప్రజలకు ఇది చాలా భారం. అందుకే చాలా మంది సెకండ్ హ్యాండ్ కార్లవైపు చూస్తారు. సెకండ్ హ్యాండ్ కారు కొనడం తెలివైన నిర్ణయం. దీని వల్ల డబ్బు ఆదా అవుతుంది. అయితే సెకండ్ హ్యాండ్ కారు కొనేటప్పుడు చాలా విషయాలను జాగ్రత్తగా చూసుకోవాలి. పాత కారు ధర, దాని పరిస్థితి, బ్రాండ్, పేపర్స్ వంటి అనేక అంశాలను చెక్ చేయాలి. మీరు సెకండ్ హ్యాండ్ కారు కొనేముందు.. ఏ ఏ అంశాలను చెక్ చేయాలో ఇప్పుడు తెలుసుకుందాం..
బ్రాండ్ – మోడల్
మొదట బ్రాండ్, మోడల్‌ను తనిఖీ చేయాలి. కారు ఏ కంపెనీకి చెందినది.. మారుతి, హ్యుందాయ్, హోండా, టయోటా, టాటా మొదలైనవి. దాని మోడల్ ఏమిటీ..? అన్నది చూసుకోవాలి. కొన్ని బ్రాండ్‌లు ఎక్కువ సెకండ్ హ్యాండ్ విలువను కలిగి ఉంటాయి. అవి మరింత నమ్మదగినవిగా ఉంటాయి.
మ్యానుఫ్యాక్చరింగ్ ఇయర్
కారు పాతబడే కొద్దీ, దాని ధర తగ్గుతుంది. అయితే కారు మంచి స్థితిలో ఉంటే దాని మ్యానుఫాక్చరింగ్‌ ఇయర్ ప్రభావం తక్కువగా ఉంటుంది.
రీడింగ్
50,000 కి.మీ కంటే తక్కువ ప్రయాణించిన వాహనాలకు సాధారణంగా ఎక్కువ విలువ ఉంటుంది. ఎక్కువ దూరం ప్రయాణించడం వల్ల ఇంజిన్, ఇతర భాగాలపై ఎక్కువ ప్రభావాన్ని చూపుతుంది.
సర్వీస్ హిస్టరీ
కారు క్రమం తప్పకుండా సర్వీస్ చేశారా? లేదా..? అన్నది తెలుసుకోవాలి. సర్వీస్ రికార్డులు అందుబాటులో ఉంటే వాహనం యొక్క విశ్వసనీయత, విలువ రెండూ పెరుగుతాయి.
ఇన్సూరెన్స్ – క్లెయిమ్ హిస్టరీ
వాహనానికి చెల్లుబాటు అయ్యే ఇన్సూరెన్స్ ఉందా..? ఇప్పటికే ఏదైనా క్లెయిమ్ చేశారా..? అన్నది చెక్ చేయాలి. ధరను నిర్ణయించడంలో ఈ విషయాలన్నీ ముఖ్య భాగాన్ని పోషిస్తాయి.
ఫిజికల్ కండీషన్
వాహనం ధరను నిర్ణయించడంలో బాడీ, పెయింట్, టైర్లు, బ్రేక్‌లు, ఇంజిన్ యొక్క పరిస్థితి ముఖ్యమైన పాత్ర పోషిస్తుంది.
డాక్యుమెంట్స్
ఆర్సీ, ఇన్సూరెన్స్, పొల్యూషన్, లోన్-క్లియరెన్స్ వంటి డాక్యుమెంట్స్ కరెక్ట్‌గా ఉన్నాయా..? లేదా..? అనేది చెక్ చేయాలి.
మార్పులు..
ఖరీదైన స్టీరియో సిస్టమ్‌లు, అల్లాయ్ వీల్స్ వంటి ఉపకరణాలు ధరను పెంచుతాయి. కానీ అధిక మార్పులు కూడా వాహనం విలువను తగ్గిస్తాయి.
రిజిస్ట్రేషన్ ప్లేస్
వాహనం రిజిస్ట్రేషన్ చేసిన రాష్ట్రం కూడా ధరను ప్రభావితం చేస్తుంది. ఉదాహరణకు.. ఢిల్లీ-ఎన్‌సిఆర్‌లో పాత డీజిల్ వాహనాలపై కొన్ని పరిమితులు ఉన్నాయి.
మార్కెట్‌లో డిమాండ్
స్విఫ్ట్, ఇన్నోవా లేదా ఆల్టో వంటి కొన్ని మోడళ్లకు సెకండ్ హ్యాండ్ డిమాండ్ ఎక్కువగా ఉంటుంది. దీని ఫలితంగా ధరలు పెరుగుతాయి.
ఇంకా ఏం చేయాలి?
టెస్ట్ డ్రైవ్ చేయాలి.
అనుభవజ్ఞుడైన మెకానిక్‌తో వాహనాన్ని చెక్ చేయించాలి.
అవసరమైన అన్ని డాక్యుమెంట్స్ ఉన్నాయా..? లేవా..? అన్నది పక్కాగా చూసుకోవాలి.
