పిల్లల్లో కాన్ఫిడెన్స్ అనేది భవిష్యత్తులో వారు సమర్థవంతమైన నిర్ణయాలు తీసుకునేలా చేయడానికి, సవాళ్లను ధైర్యంగా ఎదుర్కొనేలా ఉంచడానికి ఎంతో అవసరం. కాన్ఫిడెన్స్ లేని పిల్లలు చిన్న విషయానికే భయపడేలా మారుతారు. కాబట్టి చిన్నప్పటి నుంచే వారికి ధైర్యాన్ని, స్వతంత్రంగా ఆలోచించే తత్వాన్ని అలవాటు చేయాలి. తల్లిదండ్రులు సరైన మార్గదర్శకత్వం ఇచ్చి పిల్లల్లో నమ్మకాన్ని పెంపొందించేందుకు కొన్ని ముఖ్యమైన సూచనలను పాటించాలి.
పిల్లలు స్వతంత్రంగా ఆలోచించేలా, వారి నిర్ణయాలను గౌరవించేలా చూడాలి. చిన్న చిన్న పనుల్లో వారికే అవకాశం ఇవ్వాలి. ఉదాహరణగా వారే తమ బట్టలు ఎంచుకోవడం, స్కూల్ బ్యాగ్ రెడీ చేసుకోవడం వంటి పనులు చేయనివ్వాలి. వారి అభిప్రాయాన్ని గౌరవించి మంచి నిర్ణయాలను తీసుకునేలా మార్గదర్శనం చేయాలి.
పిల్లలు పెద్దలను గమనించి నేర్చుకునే గుణం కలిగి ఉంటారు. కనుక తల్లిదండ్రులు తమ చర్యల ద్వారా నమ్మకాన్ని ప్రదర్శించాలి. ఎటువంటి సమస్య ఎదురైనా భయపడకుండా ధైర్యంగా వ్యవహరించాలి. పెద్దలు ధైర్యంగా నమ్మకంగా ఉంటే పిల్లలు కూడా అదే తీరు నేర్చుకుంటారు.
పిల్లలు చేసే పనుల గురించి వారికి హితవుగా చెప్పాలి. చిన్న తప్పులు చేస్తే వారికి గుణపాఠం కలిగించేలా దాన్ని వివరించాలి. నేరుగా తిడితే వారు మానసికంగా నిస్సహాయతకు గురవుతారు. వారి లోపాలను సున్నితంగా సూచించడంతో పాటు మెరుగుపర్చుకోవడానికి మార్గం చూపాలి.
ప్రతీ పిల్లవాడికి ప్రత్యేకమైన ఆసక్తులు నైపుణ్యాలు ఉంటాయి. పిల్లలు ఏదైనా పనిని ఆసక్తిగా చేస్తే వారిని ప్రోత్సహించాలి. వారి బలపర్చే అంశాలను గుర్తించి మరింత రాణించేలా ప్రోత్సహించాలి.
పిల్లలు సామాజికంగా మెలగడం చాలా ముఖ్యం. వాళ్లు ఇతర పిల్లలతో కలిసిపోవడానికి ఆటలు ఆడేలా.. కలిసి గ్రూప్ యాక్టివిటీస్ చేసేలా ప్రోత్సహించాలి. ఈ విధంగా వారు తమ అభిప్రాయాలను ధైర్యంగా చెప్పగలుగుతారు.
పిల్లలు చిన్న చిన్న సమస్యలను పరిష్కరించగలిగేలా మారాలి. ఉదాహరణకు వారు స్కూల్లో ఎదుర్కొనే సమస్యలను తల్లిదండ్రులే పరిష్కరించకుండా వారికి సూచనలు ఇవ్వాలి. చిన్న చిన్న సవాళ్లను ఎదుర్కొనేలా చేయడం ద్వారా వారు ధైర్యంగా ఎదుగుతారు.
పిల్లలు విజయం సాధించినప్పుడు లేదా విఫలమైనప్పుడు వారితో పాటు ఉండాలి. విజయాన్ని ఓటమిని ఒకేలా స్వీకరించేలా నేర్పాలి. పిల్లలు ఎప్పుడైనా తల్లిదండ్రుల మద్దతు ఉందని భావిస్తే మరింత ధైర్యంగా ముందుకు సాగుతారు.
పిల్లలు ఎంత శ్రమిస్తున్నారనేది చూడాలి. మార్కులు మాత్రమే కాకుండా వారు చేసే కృషిని మెచ్చుకోవాలి. ఇలా చేయడం ద్వారా వారు మరింత పట్టుదలతో ముందుకు సాగుతారు.
ఈ చిన్న చిన్న మార్పులు పిల్లల జీవితంలో నమ్మకాన్ని పెంచేలా చేస్తాయి. తల్లిదండ్రుల ప్రోత్సాహం మార్గదర్శకత్వం ఉంటే పిల్లలు ధైర్యంగా, నమ్మకంగా ఎదుగుతారు.
