సహస్ర మర్డర్ మిస్టరీ వీడింది.. హంతకుడెవరో తేలిపోయింది.. పదేళ్ల బాలికను చంపింది పదో క్లాస్ కుర్రాడు. కత్తితో కసితీరా పొడిచి పొడిచి చంపాడు 15 ఏళ్ల టీనేజర్. ఊపిరి ఆగిపోయిన తర్వాత కూడా కత్తిపోట్లతో విరుచుకుపడ్డాడు. మీసాలు కూడా మొలవని బాలుడిలో ఇంత క్రూరత్వం చూసి పోలీసులే నివ్వరపోయారు.
నో డౌట్.. సీన్ ఆఫ్ అఫెన్స్ చూసినా.. బాలుడి పేపర్ వర్క్ చూసినా వెబ్‌ సిరీస్‌ల ఎఫెక్ట్ ఏ రకంగా ఉందో అర్థమవుతుంది. ముందుగా సీన్ ఆఫ్ అఫెన్స్‌లోకి వెళ్దాం. బాలిక బెడ్‌పై పడి ఉంది. సున్నితమైన మెడ దగ్గర 18.. కడుపు భాగంలో 7 కత్తిపోట్లు ఉన్నాయి. ఎంత కిరాతకంగా.. ఎంత కసిగా చంపాడో ఈ గాయాలను చూస్తే అర్థమవుతుంది. బిడ్డ ఎంత నరకయాతన అనుభవించి చనిపోయిందో.. అది తల్చుకుని కన్నవాళ్లే కాదూ అక్కడున్న వాళ్లంతా చలించిపోయారు.
ఈనెల 18న ఉదయం 9.30 – 10.30 గం.ల మధ్య హత్య
పోస్టుమార్టం నివేదిక ప్రకారం ఈనెల 18న ఉదయం 9.30 – 10.30 గంటల మధ్య సహస్ర హత్య జరిగినట్టు సమాచారం. ఆ సమయంలోనే బాలిక కేకలు వినిపించినట్టు పక్క భవనంలో నివసించే వాళ్లు పోలీసులకు సమాచారమిచ్చారు. డాగ్‌స్క్వాడ్‌, క్లూస్‌ టీమ్‌ సభ్యులు ఆధారాలు సేకరించారు. జాగిలాలు స్పాట్‌ నుంచి నేరుగా బయటకు వెళ్లిపోయాయి. దర్యాప్తులో భాగంగా సీసీ కెమెరాల ఫుటేజ్‌లు సేకరించి వేర్వేరు కోణాల్లో సమాచారం సేకరించారు. అనుమానితుల్ని అదుపులోకి తీసుకుని ప్రశ్నించారు. కానీ బలమైన ఆధారాలు ఎక్కడా పోలీసులకు దొరకలేదు.
ఆ రోజు సాఫ్ట్‌వేర్ ఇంజనీర్ వర్క్ ఫ్రమ్ హోం
నాలుగు రోజులైనా మర్డర్ మిస్టరీ వీడకపోవడంతో పోలీసులు ఛేదిస్తారా చేతులెత్తేస్తారా అన్న అనుమానాలు బలంగా వినిపించాయి. ఈ క్రమంలో ఓ సాఫ్ట్‌వేర్ ఇంజనీర్ ఇచ్చిన హింట్‌ కీలకంగా మారింది. సహస్ర హత్య జరిగిన రోజు సాఫ్ట్‌వేర్ ఉద్యోగి వర్క్ ఫ్రమ్ హోం చేశాడు. ఇంట్లో ఉంటూనే బయట ఏం జరుగుతుందో యథాలాపంగా గమనించాడు. అప్పుడు కంటపడ్డాడో బాలుడు. దాక్కుంటూ వెళ్తూనే.. సజ్జపైన లెటర్‌ పెట్టాడు. అదే విషయాన్ని పోలీసులకు పూసగుచ్చినట్టు వివరించాడు సాఫ్ట్‌వేర్ ఇంజనీర్. ఈ మాత్రం క్లూతో పక్క బిల్డింగ్‌లో కుర్రాడ్ని అదుపులోకి తీసుకున్నారు. ఏం చేశావ్‌.. ఎందుకిలా చేశావ్‌ అని ప్రశ్నించారు. ముందుగా బుకాయించిన బాలుడు.. ఆ తర్వాత క్రైమ్ సీన్ మొత్తం రివీల్ చేశాడు.
చూడ్డానికి కుర్రాడే.. టెన్త్‌ క్లాస్ చదువుతున్న వాడే.. బట్.. అతని ఆలోచన విధానం చూస్తే మైండ్ బ్లాంక్ అవుతోంది.. పట్టుమని పదిహేనేళ్లు కూడా లేవు… ఇన్ని క్రిమినల్ ఆలోచనలా..? అన్న విస్మయం కలుగుతుంది. సాఫ్ట్‌వేర్ ఇంజనీర్ ఇచ్చిన సమాచారంతో బాలుడ్ని అదుపులోకి తీసుకుని విచారించారు పోలీసులు. ముందుగా లెటర్‌ గురించి ఆరాతీశారు. ఆపై దబాయించి ప్రశ్నిస్తే.. నమ్మలేని నిజాలు బయటపడ్డాయ్‌. బాలుడి క్రిమినల్ బ్రెయిన్ చూసి పోలీసులు అవాక్కయ్యారు. ఎందుకంటే,.. ముందే పేపర్‌పై స్క్రిప్ట్‌ రాసుకుని ఇంట్లోకి చొరబడ్డాడు. నిందితుడి ఇంట్లో హత్యకు ఉపయోగించిన కత్తి, రక్తంతో తడిచిన దుస్తులు, ముందే రాసుకున్న లెటర్‌ను స్వాధీనం చేసుకున్నారు పోలీసులు
సహస్ర ఇంటి పక్కనే బాలుడి నివాసం
బాలుడి క్రిమినల్ బ్రెయిన్ ఎలా ఉందో ఓసారి తెలుసుకుందాం. దానికి అతను పెట్టుకున్న పేరు మిషన్ థెఫ్ట్‌. కాకపోతే అది అనుకోకుండా.. మిషన్ మర్డర్‌గా మారింది. సహస్ర ఇంటి పక్కనే ఉంటాడు బాలుడు. వాళ్లింట్లో ఎవరెవరు ఉంటారు..? ఎప్పుడెప్పుడు పేరెంట్స్ ఆఫీస్‌కి వెళ్తారో అంతా గమనించాడు. ఆ తర్వాత ప్లాన్ వేసుకున్నాడు. మనసులో ఏం అనుకున్నాడో.. దాన్ని ఎలా అమలు చేయాలో ఓ అంచనాకు వచ్చాడు.
step 1: గో టు హోమ్‌.. అంటే చోరీ కోసం ముందే ఇంటిని సెలెక్ట్‌ చేసుకోవడం.. ఎలా వెళ్లాలో ప్లాన్ చేసుకోవడం
step 2: టేక్‌ గ్యాస్ అండ్‌ టేబుల్‌.. ఇంటికి వెళ్లాక టేబుల్‌ చూసుకోవడం.. లాక్‌ పగలగొట్టడానికి గ్యాస్‌కట్టర్‌ని రెడీ చేసుకోవడం
step 3: ఫైర్‌ ద గ్యాస్.. గ్యాస్‌కట్టర్‌ను వెలిగించడం
step 4: కీప్‌ లాక్‌ ఆన్‌ ద గ్యాస్.. గ్యాస్‌కట్టర్‌తో లాక్‌ను పగలగొట్టడం
step 5: కట్‌ విత్ నైఫ్.. ఆ తర్వాత కత్తితో లాక్‌ను కట్‌ చేయడం
step 6: ఆఫ్టర్‌ కటింగ్‌ టేక్‌ మనీ.. ఇంట్లోకి వెళ్లి మనీ దొంగతనం చేయడం
step 7: లాక్‌ ఫర్‌ హోమ్‌… ఆ తర్వాత ఇంటికి లాక్‌ చేయడం
step 8: లీక్ ద గ్యాస్.. ఇంటికి లాక్‌ వేసేముందు గ్యాస్ లీక్ చేయడం
step 9: కమ్‌ ఔట్‌ హోమ్‌.. ఇంట్లోకి బయటికి రావడం…
step 10: లాక్‌ ద హోమ్‌… ఇవన్నీ ఆర్డర్‌లో లేనపోయినా.. ఇదే రాసుకున్నాడు
సింపుల్‌గా చెప్పాలంటే.. ఇంట్లోకి వెళ్లాలి.. మనీ తీసుకోవాలి.. గ్యాస్ లీక్ చేయాలి.. బయటికి వచ్చేయాలి.. ఇదీ, ఈ కుర్రాడి చోరీ ప్లాన్ గ్యాస్ లీక్ చేసి పెంట్‌హౌస్‌ పేల్చేయాలన్న ప్లాన్!
దొంగతనం చేయడం ఒక ఆలోచన అయితే.. గ్యాస్ లీక్ చేసి ఆ ఇంటిని పేల్చేయాలన్నది మరో ఆలోచన. ఎటు చూసినా తన పాత్ర బయటకు పొక్కకూడదని చాలా తెలివిగా వ్యవహరించాడు. మరోవైపు సీసీ కెమెరాలు ఎక్కడెక్కడ ఉన్నాయి.. అందులో ఏమేం కవర్ అవుతాయో కూడా గ్రహించాడు. అందుకే పోలీసులు ఎన్నిసార్లు సీసీ ఫుటేజ్‌ తిరగేసినా బాలుడి ఆనవాళ్లు ఎక్కడా కనిపించలేదు. ఓ దశలో పోలీసుల దర్యాప్తు క్లిష్టంగా మారింది. ఎంతమంది స్థానికుల్ని, అనుమానితుల్ని అదుపులోకి తీసుకుని విచారించినా ఉపయోగం లేకుండాపోయింది. బట్.. సాఫ్ట్‌వేర్ ఇంజనీర్ ఇచ్చిన క్లూ మర్డర్ మిస్టరీ ఛేదించారు పోలీసులు.
