సుంకాల విషయంలో అమెరికా, భారతదేశం మధ్య పెరుగుతున్న వివాదంపై ఐక్యరాజ్యసమితిలో అమెరికా మాజీ రాయబారి నిక్కీ హేలీ తీవ్రంగా స్పందించారు. భారతదేశాన్ని శత్రువుగా కాకుండా ముఖ్యమైన ప్రజాస్వామ్య భాగస్వామిగా పరిగణించాలని ఆమె అమెరికా అధ్యక్షుడు డొనాల్డ్ ట్రంప్‌తో అన్నారు. 25 ఏళ్ల సంబంధాల బలం బలహీనపడితే అది పెద్ద తప్పు అవుతుందని హేలీ హెచ్చరించారు. భారతదేశ వృద్ధి చైనా లాగా ముప్పు కాదని, ఒక అవకాశం అని ఆమె స్పష్టం చేశారు.
భారతదేశాన్ని ఎల్లప్పుడూ ప్రజాస్వామ్య భాగస్వామిగా చూడాలని నిక్కీ హేలీ కోరారు. భారతదేశాన్ని చైనా లాగా ప్రత్యర్థిగా పరిగణించరాదని ఆమె స్పష్టం చేశారు. రష్యా నుండి చమురు కొనుగోలు చేసినంత మాత్రాన, భారత్‌పై ఆంక్షలు విధించడం సరికాదన్నారు. అమెరికాకు ప్రత్యర్థి దేశం చైనా ఆంక్షల నుండి తప్పించుకుందని, భారత్ సుంకాలతో ఒత్తిడికి గురవుతోందని ఆమె అన్నారు. అమెరికా, భారతదేశం మధ్య భాగస్వామ్యం చైనాకు వ్యతిరేకంగా బలమైన అడుగు కాగలదని హేలీ అన్నారు. ఈ సంబంధం బలహీనపడితే, అది వ్యూహాత్మక విపత్తుగా మారుతుందన్నారు. చైనాతో పోలిస్తే భారతదేశం ప్రజాస్వామ్య పెరుగుదల స్వేచ్ఛా ప్రపంచానికి ముప్పు కాదని ఆమె స్పష్టంగా చెప్పారు. అమెరికాకు భారతదేశం ఒక ముఖ్యమైన సరఫరా గొలుసు ఎంపికగా మారగలదని నిక్కీ హేలీ అన్నారు. భారతదేశం చైనా లాగా ఉత్పత్తి సామర్థ్యాన్ని కలిగిన దేశం. వస్త్రాలు, చౌకైన మొబైల్స్, సోలార్ ప్యానెల్స్ వంటి దేశీయంగా వెంటనే తయారు చేయడం సాధ్యం కాదని, అమెరికా ప్రజల అవసరాలను ఎలా తీర్చగలదని ప్రశ్నించారు
మధ్యప్రాచ్యాన్ని స్థిరీకరించడంలో భారతదేశం పెరుగుతున్న ప్రభావం, భద్రతా పాత్ర ముఖ్యమైనదని హేలీ అన్నారు. అమెరికా అక్కడ తన సైనిక, ఆర్థిక ఉనికిని తగ్గిస్తున్నందున, భారతదేశ స్థానం, వ్యూహాత్మక ప్రాముఖ్యత మరింత పెరుగుతుంది. భారతదేశం భౌగోళిక స్థానం కూడా చైనాకు సవాలుగా మారవచ్చని హేలీ అభిప్రాయపడ్డారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
