బాబా రాందేవ్ కంపెనీ పతంజలి ఫుడ్ తన పెట్టుబడిదారులకు బంపర్ గిఫ్ట్ ఇవ్వబోతోంది. కంపెనీ గురువారం బోనస్ షేర్లను ఇస్తున్నట్లు ప్రకటించింది. కంపెనీ డైరెక్టర్ల బోర్డు సమావేశంలో ఈ నిర్ణయం తీసుకుంది. 2:1 నిష్పత్తిలో బోనస్ షేర్లను ఇవ్వాలని బోర్డు సిఫార్సు చేసింది. అంటే, కంపెనీలో 1 వాటా (రూ. 2 విలువ) ఉన్న వాటాదారులకు 2 కొత్త షేర్లు (రూ.2 విలువ) ఉచితంగా ఇవ్వనుంది.
ఈ బోనస్ షేర్ పథకం వాటాదారుల ఆమోదంపై ఆధారపడి ఉంటుంది. దీని కోసం కంపెనీ తన నిల్వలను ఉపయోగిస్తుంది. కంపెనీ త్వరలో రికార్డ్ తేదీని ప్రకటిస్తుంది. ఆ తేదీ నాటికి వాటాదారుల పేర్లు కంపెనీ రికార్డులలో ఉండాలి. తద్వారా వారు బోనస్ షేర్లను పొందవచ్చు.
ఈ పథకం కింద కంపెనీ దాదాపు 72,50,12,628 కొత్త షేర్లను జారీ చేస్తుంది. బోనస్ తర్వాత కంపెనీ మొత్తం వాటా మూలధనం రూ.145 కోట్ల నుండి రూ. 217.50 కోట్లకు పెరుగుతుంది. మార్చి 31, 2025 నాటి బ్యాలెన్స్ షీట్ ప్రకారం, ఈ బోనస్ ఇష్యూ కోసం కంపెనీ వద్ద తగినంత నిల్వలు ఉన్నాయి. కంపెనీ మూలధన విముక్తి నిల్వ రూ. 266.93 కోట్లు, సెక్యూరిటీల ప్రీమియం రూ.4704.37 కోట్లు, సాధారణ నిల్వ రూ. 418.15 కోట్లు. బోర్డు సమావేశం జరిగిన రోజు నుండి రెండు నెలల్లోపు అర్హత కలిగిన వాటాదారుల ఖాతాలకు బోనస్ షేర్లు జమ అవుతాయి. ప్రస్తుత వాటాదారులకు ప్రయోజనం చేకూర్చడానికి, మార్కెట్లో కంపెనీ వాటాల ద్రవ్యతను పెంచడానికి ఈ చర్య తీసుకుంటోంది.
బోనస్ షేర్లు అంటే ఏమిటి?
బోనస్ షేర్లు అంటే కంపెనీ తన ప్రస్తుత వాటాదారులకు ఉచితంగా ఇచ్చే అదనపు షేర్లు. ఈ షేర్లు కంపెనీ నిల్వల నుండి అందిస్తుంది. ఇది కంపెనీ మొత్తం షేర్ల సంఖ్యను పెంచుతుంది. అలాగే షేర్ ధర అదే నిష్పత్తిలో తగ్గుతుంది. కానీ కంపెనీ మొత్తం విలువ అలాగే ఉంటుంది. ఇది కంపెనీ మంచి ఆర్థిక స్థితికి, వాటాదారులకు బహుమతిగా పరిగణిస్తారు.
మార్చి 2025 త్రైమాసిక ఫలితాలు:
పతంజలి ఫుడ్స్ స్వతంత్ర నికర లాభం మార్చి 2025 త్రైమాసికంలో 74% పెరిగి రూ.358.53 కోట్లకు చేరుకుంది. గత ఏడాది ఇదే త్రైమాసికంలో ఇది రూ.206.31 కోట్లు. కంపెనీ కార్యాచరణ ఆదాయం కూడా రూ.9,744.73 కోట్లకు పెరిగింది. గత ఏడాది రూ.8,348.02 కోట్లు. 2024-25 పూర్తి ఆర్థిక సంవత్సరానికి కంపెనీ నికర లాభం రూ.1,301.34 కోట్లుగా ఉంది. గత ఏడాది రూ.765.15 కోట్లు. మొత్తం ఆదాయం రూ.34,289.40 కోట్లుగా ఉంది. గత ఏడాది రూ.31,961.62 కోట్లు.
స్టాక్ కదలికలు:
గత ఏడాది కాలంలో కంపెనీ స్టాక్ 19% కంటే ఎక్కువ లాభపడింది. అలాగే ప్రస్తుతం రూ.1,862.35 వద్ద ట్రేడవుతోంది. అయితే ఇది ఇప్పటికీ దాని 52 వారాల గరిష్ట స్థాయి రూ.2,030 (సెప్టెంబర్ 2024) కంటే దాదాపు 8% తక్కువగా ఉంది. జూలై 2024లో దీని 52 వారాల కనిష్ట స్థాయి రూ.1,541.
మరిన్ని బిజినెస్ వార్తల కోసం ఇక్కడ క్లిక్ చేయండి
