జమ్మూ కాశ్మీర్‌లోని పహల్గామ్‌లో జరిగిన ఉగ్రవాద దాడి తర్వాత భారతదేశం, పాకిస్తాన్ మధ్య ఉద్రిక్తతలు తారాస్థాయికి చేరుకున్నాయి. ఉగ్రవాదాన్ని ప్రోత్సహిస్తూ.. పర్యాటకులపై పిరికిపందా చర్యలతో పాకిస్తాన్‌పై దాడి చేస్తోంది భారత్. భారత ప్రభుత్వం సింధు జల ఒప్పందం, దిగుమతి-ఎగుమతులపై ఆంక్షలు, పాకిస్తాన్‌తో ప్రజా సంబంధాలపై నిషేధం విధించింది. దీంతో పాకిస్తాన్ కోపంగా ఉంది. పదే పదే బెదిరింపులు జారీ చేస్తోంది. తాజాగా, పాకిస్తాన్ రక్షణ మంత్రి ఖవాజా ఆసిఫ్ మరోసారి భారత్‌పై దాడి గురించి మాట్లాడారు.
సింధు నదిపై ఏదైనా ఆనకట్ట నిర్మించి, నీటిని ఆపడానికి ప్రయత్నిస్తే, పాకిస్తాన్‌పై ప్రత్యక్ష దాడిగా పరిగణిస్తామని ఖవాజా ఆసిఫ్ అన్నారు. సింధు నదిపై డ్యామ్ నిర్మాణం రెండు దేశాల మధ్య జల ఒప్పందాన్ని ఉల్లంఘించడమే అవుతుందన్నారు. భారతదేశం ఇలాంటిదేదైనా చేస్తే పాకిస్తాన్ మౌనంగా కూర్చోదు. దానిపై దాడి చేస్తుందని ఖవాజా ఆసిఫ్ హెచ్చరించారు. జియో న్యూస్‌తో మాట్లాడుతూ, పాకిస్తాన్ రక్షణ మంత్రి ఖవాజా ఆసిఫ్ , సింధు జల ఒప్పందాన్ని రద్దు చేయడం దానిని ఉల్లంఘించడమేనని అన్నారు. నీటిని ఆపడానికి లేదా మళ్లించడానికి భారతదేశం ఏదైనా నిర్మాణం చేస్తే, మేము ఆ నిర్మాణాన్ని దాడి చేసి పూర్తిగా ధ్వంసం చేస్తామని బెదిరించారు. యుద్ధం అనేది ఫిరంగులు, తుపాకులతో మాత్రమే జరగదని, నీటిని ఆపడం కూడా ఒక రకమైన యుద్ధమే అన్నారు. నీరు లేకుండా ప్రజలు ఆకలి, దాహంతో చనిపోవచ్చని ఖవాజా ఆసిఫ్ ఆందోళన వ్యక్తం చేశారు.
ఇప్పటికే నాశనమైపోయిన పాకిస్తాన్‌కు ఈసారి భారతదేశంలో జరిగిన ఉగ్రవాద దాడి చాలా మూల్యం చెల్లించింది. భారత ప్రభుత్వం సింధు జల ఒప్పందాన్ని నిలిపివేసింది. ఇది పాకిస్తాన్ కు పెద్ద దెబ్బే. ఇప్పుడు దీని గురించి ప్రపంచాన్ని వేడుకుంటోంది పాకిస్థాన్. అంతకుముందు, అమెరికా విదేశాంగ కార్యదర్శి మార్కో రూబియోతో జరిగిన సంభాషణలో, పాకిస్తాన్ ప్రధాన మంత్రి షాబాజ్ షరీఫ్, సింధు జల ఒప్పందాన్ని 250 మిలియన్ల పాకిస్తానీయుల జీవనాడి అని, భారతదేశంపై ఒత్తిడి తీసుకురావాల్సిన అవసరం ఉందని విచారం వ్యక్తం చేశారు.
అంతకుముందు, సింధు జల ఒప్పందంపై నిషేధం తర్వాత పాకిస్తాన్ ఎంపీ బిలావల్ భుట్టో భారతదేశానికి వ్యతిరేకంగా వివాదాస్పద ప్రకటన చేశారు. సింధు నది పాకిస్తాన్ కు చెందుతుందని భుట్టో అన్నారు. పాకిస్తాన్‌కు నీళ్లు ఆపితే, వారి రక్తం ప్రవహిస్తుందన్నారు. ఇప్పుడు పాకిస్తాన్ రక్షణ మంత్రి ఈ విషయంపై భారతదేశంపై దాడి చేస్తానని బెదిరిస్తున్నారు. వాస్తవం ఏమిటంటే భారతదేశం ఒకదాని తర్వాత ఒకటి చేస్తున్న చర్యలు పాకిస్తాన్‌లో భయాందోళనలను సృష్టించాయి.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
